Hevwelatîyên hêja,
Her weku hûn jî xeberdarin, di çend salên bihurî da, li welatê Almanyayê piranîya hêzên sîyasî yên ji her çar parçên Kurdistanê, bi pêkve cejna neteweyî Newroz çêkirin.

Bi pêkve hevkarîya hêzên Kurd, bûye cihe keyfxweşîya hevwelatîyên Kurd û hêvîya wan pir bi hêztir kirîye.

Ev kar û xebata hevdengê hêzên Kurd, bûye sedemê ku, li ser kar û xebata hevbeş pê girtir bibin, ji ber evê ku xêr û bêra niştimanî têda ye. Hevkarîyê bikin erkekî xwe yê niştimanî, di ser hemû berjewendîyên hizbatîyê da rabigirin.

Piştî pîroz kirina cejna Newrozê, me 19 hêzên sîyasî yên Kurd, di civîneke giştî da, biryar da ku, li ser ewê armanca ku pêşda jî me gotî, bi hev ra hevkarî kirin, li ser xêr û berjewendîya gelê Kurd e.

Dibe eve jî bê gotin ku, xebat, wê bi rewşeke demokratîk, li berçav girtina teybetmendîya her parçeyekî Kurdistanê û bi ruhekî biratî û ji hev tê gîhiştin, parastina berjewendîyên dirêjdemîyê Kurdistanê bê kirin û gavan pêşda bavêjin.

Bo me hemûyan rohin û aşikiraye ku, xebatê hevbeşê hêzên Kurdistan, li Almanyayê, ji alîyekêve, li hev nêzîkbûna hêzan, yekitîya gelê me hêztir dike, ruha biratîyê di nava refên gel da berfirehtir dike. Ji alîyekî dinêve jî, rêka pirdengî û pirrengîya sîyasî, bi hevra jîyana çend partîyê diceribîne, ev yêke bo pêşerojê dibîte tecrubeyeke binirx. Lema li ser me hemû alîyan lazime, bi berpirsarîyeteke mezin gavan bavêjin, xwe di evê qadê da berpirs bizanin. Hemû hêz û xebata xwe ji bona serkevtina evê armancê bidin.

Di vê derê da hewceye evê jî bêjin ku, di xebata van salên bihurîda hemû hêz û partîyên bi hevra kar û xebat kirinî, bi berpirsîyarî û dilsojîyekê berçav, pêwendîyên demokratîkî bi hevra meşîyane. Lema serkevtî bûne, dibe em hemû evê xala hevbeşê serkevtî peşvetir bibin.

Em ev hêzên sîyasî yên gelê me soz û peyman didin ku, di evî alîyêve erkê niştimanîya xwe bi rêve bibin, berxwedana xwe, bi germ û gurî pêşda bibin, hûn hevwelatîyên hêja her weku caran piştîvanîyê xwe de mukurbin, hêz bidine me.

Bijî Kurdistan!
Bijî yekitîya hêzên sîyasî yên Kurdistanê!

_______________________________________________
HEVKARÎ-Platforma Rexistinên Kurdistan Li Almanyayê
(PDK-Iran, PDK, KTP, PRK-Rizgarî, PSK, PADEK, RSDK, PIK, PDK-Bakur, PDPK-S, PYK-S,
PDK-S, PYDK-S ( Yekîtî ), PHGK-S, PDK-S ( El Partî ), PÇK-S, PDK-S ( El Partî ), PÇK-S)