BER BI DANÎNA KORDÎNASYONA  DEMOKRATÎK A KURDÊN EWROPA

Rêxistinên kurdî yên ku li welatên Ewropa di warên cihê de dixebitin,  piştî civînên Stokholm û Wupertalê, di 14 îlon 2001an li Parîsê, li  Enstîtuya kurdi civiyan.Piştî minaqeşeyên fireh, beşdarên civîna Parîsê biryara danîna  Kordînasyona demokratîk a Kurdên Ewropa (DEM-KURD) dan û li ser bingeh û  prensîbên wê li hev kirin.

Kordînasyon çi ye ?
Kordînasyon forumeke şêwr û hevkariya rêxistinên demokratîkên kurdî yên  Ewropa ye. Hemû rêxistinên kurdî yên ku di warên entegrasyona Kurdên  Ewropa bidestxistina mafên wan ên ziman, çand û nasnameyê de û/an ji bo  nasandina gelê kurd û pirsa kurdî dixebitin û prensîben jêrîn qebûl dikin dikarin bibin endamên vê Kordînasyonê. Her rêxistina endam serxwebûn û azadiya xwe û statuya xwe diparêze.

Armanca sereke ya Kordînasyonê ew e ku rêxistin û komeleyên endam  bikaribin li ser pirsên ku entegrasyona Kurdên welatekî (xwendina zimanê  kurdî, nasîna nasnameya kurdî, amadekirina hin kampanyayên ji bo  berjewendiyên (menfeetên) giştî yên Kurdên wî welatî) an/û li ser pirsên  giştî yên tevahiya civaka kurdî ya Ewropa bi hev bişêwirin, bi hevre hin çalakî û bernameyan amade bikin û bi cîh binin.

Prensîbên Kordînasyonê
Komele û rêxistinên ku dixwazin bibin endamên Kordînasyonê divê ku  prensîbên jêrîn qebûl bikin 

1° Kurdîstanîtî : divê ku her komeleya endam ji Kurdên her aliyên  Kurdistanê re vekirî be, ji bo nasîna mafên çandî û nasnameya Kurdên  Ewropa bixebite û bi awayên demokratîk û aştî mafê gelê kurd ê çarenûsê  biparêze.

2° Demokrasî : divê ku her komeleya endam di meşandina karên xwe de  riayeta pirensîbên pluralîzma demokratîk, bi taybetî ya azadiya fikr û  baweriyên cihê qebûl bike, ji Kurdên ji her baweriyê (sunnî, şiî, alewî,  kakeyî, êzdî, Ehlê Heq, ateîst, hwd) re vekirî be.  Komeleyên ji bo serdestiya dîn an mezhebekî hatibin danîn nikarin  bikevin nav Kordînasyonê.

3° Wekheviya jin û mêran : divê ku her komelaya endam di bername û  çalakiyên xwe de wekheviya jin û meran bide pêş çav û ji bo pêşveçûna wê  bixebite.

4° Entegrasyona Kurdên Ewropa di çarçeweya riayeta qanûnên welatê ku tê  de dijîn :  divê ku her komeleya endam bixebite ku Kurdên Ewropa  bikaribin tevî nasnameya xwe ya kurdî di civaka ewropî de bên qebûl  kirin û di warên xwe yên xwendin an xebatê de pêşve herin û xwe ji her  awayî zor û şîddetê dûr bixin.

5° Şefafiya malî : divê ku her komeleya endam ji alî hatiniyên xwe yên  malî û xercên xwe ve him ji bo endamên xwe him ji bo meqam û raya giştî  ya welatê xwe vekirî û şefaf be, alîkariyên ji kaniyên tarî qebûl meke.  Bi taybetî, nabe ku ji tu dewleta ku zordestiyê li parçeyek gelê kurd  dike tu alîkariyê qebûl bike. 

Komela an rêxistina ku ji alî malî ve bikeve bin gumanê rêz, îtibar û nifûza xwe winda dike û ziyanê dighîne  doza kurdî.

6° Nealîgiriya siyasî : divê ku komele û rêxistinên demokratîk ên kurd  li Ewropa ji bo entegrasyona Kurdên Ewropa û piştîvaniya doza kurdî  dixebitin û dikarin di vê çarçeweya fireh de Kurdên ji navçe û baweriyên  cihê bicivînin. Alîgir bûna hin partiyan an bi hin partiyên din re  ketin polemîkên siyasî ne karê koordinasyon e û dikare bibe sedemê perçebûn û  bihevketina Kurdên Ewropa.

Organên Kordînasyonê:
Ta ku rêxistinên demokratîk ên her welatekî Kordînasyona xwe deynin, ewê  Kordînasyona Ewropa bi du organan bixebite. 

1° Civîna gelemperî : salê carekê dicive, her rêxistin an komele bi  berpirsiyarekî xwe beşdarê vê civînê dibe. Amanca civînê diyarkirina  çalakî û bernameyên hevbeş (muşterek) ên ji bo seranserê Ewropa yê ye.  Her komele dikare pêşniyarên xwe yên hevkariyê pêşkêş ke û rêxistinên ku  di warên nêzîk de (entegrasyon, mafên mirov, pirtûkxane, weşan, hwd.)
dixebitin dikarin bi awayekî serbest li dor bernameyeke salane ya  hevkariyê bi hev re bixebitin.

2° Sekretarya : Di destpêkê û heta Civîna Gelemperî, ji 4 kesan pêk tê  (berpirsiyarek Enstîtuya kurdî, yekî Federasyona kurdî ya Swêdê, yekî  Komkarê û yek jî ji Buroya kurdî ya agahdariyê (Bruksel). Sekretarya, di  navbera du civînên gelemperî de, gava ku pêwistî hebe dicive ji bo şêwrê  an bicîhanîna çalakiyên hevbeş.

Gava ku komele û rêxistinên kurdî yên her welatî di nav Kordînasyonekê  de bicivin ewê berpirsiyarekî kordînasyona her welatekî bibe endamê  sekretaryayê.

Ku Civîna Gelemperî pêwist bibîne dikare ji bo salekî serek û yek an du  cîgirên serekê Kordînasyonê helbijêre.

Dîsa ku Civîna Gelemperî pêwist bibîne Kordînasyon dikare bi îngilîzî û  kurdî bultenek an/û websîteyek pêk bîne.

Beşdarên Civîna Parîsê ku li ser van biryarên gihîştine hev : 

Buroya Kurdi ya agahdariyê li Belçîka, 
Enstîtuya kurdî ya Parîsê, Federasyona
Komeleyên Kurdistanê li Swêdê, 
HÎNBÛN (Berlîn), 
HOYBÛN,  
Komela Kurdistan li Belçîka, 
Yêkitiya Karkerên Kurdistan lı Holland, 
Komela Navnetewi ya ji bo Mafên Mirov li  Kurdistan (Elmanya), KOMKAR û Kurdish Advice Centre (Brîtanya Mezin).