Bi hizaran kurdên pênaber ji her çar parçên Kurdistanê li 
bajêrê Wuppertal li Almanya yê bi pêkve çejna  neteweyî 
NEWROZ pîroz kirin. Di roja 31 Adarê kurdên penaber 
û durî welat ji her çar parçên Kurdistanê bi şahîya şeva
Newrozê şad bun, bê eve ku reng û dengê partîyekê û an 
jî kesatîyekê li serbe cejina Newrozê bi rengekî  neteweyî 
pîroz dikin. Her ev yêke ye ku dilê  hizaran kurdên mişextî 
xweş dike û hêvî  û hêza xweragiryê dide dilsozên doza 
Kurdistanê.  Ev yêke pila berz buna hesta welatparêzî yê  
li hemberi berteskîya hizbatiyê di nava kurdanda dide nîşan
dan.

Komîta kargêre çejina Newrozê bi navê  17 partî û rêxistinên 
Kurd ji hemû parçên Kurdistanê rêveberya  evê şevê kir. Ew 
17 hêz û partîyên beşdar û rêveber biritî bun; PDK-IRAN,PRK-RIZGAR,PSK,PADEK,PîK,RSDK,îA,PDPKS,PYKS,
PYDS(YEKETî),PHGK-S,PSK-S,PDK-S(ELPARTî),PDKS,PÇK-S,
PDK-BAKUR,KTP(Hizbî Zehmetkêşanî Kurdistan) her wusa PDK û
YNK piştgîrîya xwe li evê şevê  kirin.

Komîta hevbeşe şahîya Newrozê peyameke hevbeş bo bir û raya giştî û gelê Kurdistanê bi du zimanan; bi  Almanî ,bi Kurdi ( Soranî, Zazakî,Kurmanci) belavkir.

Destpêka şevê da nunerên hemu partî û rêxistinên beşdar li cejina Newrozê derkevtine berhîya hizaran kurdên dilsoz û destdanehev û bi yêkdengi û tevrengî, kêç û kurên Koma Dîyar surudê Neteweyî EY REQIB  xwandin.Civata beşdar ku qederê 5 hizar kesan dikir, bi dengeki bilind li jêr ala rengîn da li ser pîya surudê kurdperwerîyê xwandin û  yêketî û hev xebatîya hêzên kurd dilê wana germ û gur dikir. Piştî wê, bêjerên şevê anîne ziman ku roja 31 Adarê li sedarê dana Serokkomarê Kurdistanê, Pêşewa QAZî MUHEMED û hevsengêrên wî nemirîye û ev roje ji roja Şehîdên Kurdistanê ye, her wusa îşaret ji dest çona nemiran Seyida TIREJ û KEK NURETTIN BASUT kirin û ji bona gişt şehîdên bizava rizgarîxwazîya Kurdistanê deqiqek bêdengî dane ragihandinê.

Di evê şevê da wênên her balkêş, eve bu ku li ser perda mezine dîya yê da dihate nişandan,resmên serwerên Netewa kurd, Pêşewa QAZI, Şêx SEID, Seyid RIZA, Mistefa BARZANI, Dr.QASIMLO bun,ruha wana jîndar dibu û civata peşdar bi wan serwerana serbilind dibun. Kurd, hemû heval û endamên 17 hêzên kurd,  wekû yêk beden û bidil û can bi hevra xebat dikirin û evê yêkê dilê xelkê xweştir dikir. Dîmenên wîlo hêvî bexş, bo rewşa me îroyîye kurda, ku li jêr destê zulma dagîrkeranda welat hatîye parçe parçe kirin û ji hev bir bir kirine û li hev kirine neyra gelek biha giran û hewceye.

Loma 17 partî û hêzên kurd, peyamekî hevbeş li ser evê çalakîyê belav kirin. Di peyama xwe da ev rewşe bi zelalî danîne berçavan û hewcedarîya kar û xebata bihevrayî û hevrêtîyê  di anine ziman. Di peyama hevbeşda, bi giştî li ser rewşa Kurdistanê wuha dihate gotin:

“....Her ji ber evê berpirsatîyê ye kû em 17 hêzên Kurdistanî bi hevra di evê rojê da cejina Newrozê pîroz dikin. Ev pêngave û bizavên bi evî avayî, yêkitî û biratî ya nava refên gelême  bi dost û dijiminan dide nîşandan. Her ji ber evêye ku çu hêzek nikare birahiya pêşve çona  yêkitî û hevxebatîya me bigire.

Hevwelatîyên hêja!
Her çiqas iro roja şahî û govend girtinê ye, lêbelê bo me kurda di rojeke wekû  iroyî da, hewceye çavekî dur bîni û hizreke hur bînî, bi ser rewşa netewa  kurd  û xebata xwe da bînin û li berhev bidin. Her weku hun jî dizanin di şertên îroyî da piranîya gelên cîhanê bi bextewerî û serxwebuniyê da dijîn, hindek ji wana ku çend milyonekin,rêka çareserya bi hevra bi yêksanî  jîyanê afirandine, aşitî û bi biratî dijîn. Lê belê dagîrkerên Kurdistanê  her niha di evî qirnî da jî, sîyaseta  xwe ya zordarî û çewsandinê  li hemberê  gelê meda dide domandin. Her weku berê bi tundî bersîva her daxwazîyeke gelê  kurd diden û ji ewê sîyaseta xwe ya şovên paşgav nabin û bi hîç wec daxwazîyên gelême qebul naken......“

Di peyamê hevbeşda li ser rewşa bakura Kurdistanê ji wuha dihate gotin:
“....Her weku hun ji dizanin, desthelatdarên Turkî yê bi evê rewşa xwe ya şepirze ye aburî da,li hemberî her hêzeke mezinda serê xwe şordike û xulamî  ya wana jî dike,lê belê naxwaze daxwazîyên berheqe netewa me bi resmî binase, dest jî ewê siyaseta xwe ya dagîrkerî û hovî yê da bikêşe. Evê rejîmê di evan çend salên dumahîyê da gelek bizav kir ku, bi ewê  delîva  bo wana hilkevtî da, ji hinde alyî û hêzên  jikest xwariyên kurd, berhê wer bigirin,hita ku bi xiyala xwe bizava rizgarîxwazî ya gelêm pêlêxin û bê hevî bikin, bizavê di nava xwe da bifetisînin. Lê belê ev rejîme xwe dixapîne. Gelê kurd her weku her car wê nexşe û pilanên dagîrkeran û harîkarên wana jî aşkira biket....“

Gelek partî û kesatîyên navdarên biyanî û kurd bêşdarî şevê bun û pêyamên xwe yên  pirozbahîyê şandin. Ji ber evê ku gelek peyam hatibun û wext ji nebu bêne xwandin, navên wana hatine pêşkêş kirin. Peyama hevrê birêz Kemal BURKAY, sekreterê giştî yê Partîya  Sosyalîsta Kurdistan ji dinava peyamanda  bu.

Hunermendên bihagiran û dilovan, xebatkarên sitiran û folklora kurdî, şev xemilandin û civat bi coş anîn. Şivan PERWER, Necmedîn XULAMI, ŞÊRÎN, Biha ŞEXO, Yilmaz ÇELİK, Said GEBARI, GULISTAN, Roni CAN bi deng û avazên xweşe xwe û bi hunera kemanavanîya Kek Necmî û gurba muzikvana bi her sê zarên kurdî şev xweştir û gel dil xweş kirin. Komên govendê, Koma  DIYAR, AZADI û BIYAN xemla şevê bun. Şev 7 seata kêşa û komên govendê  hita dumahiya şevê ji di hola salonêda her digêra. Xort û qîzên kurd xemên dilên xwe direvandin.  Kurdên durî welat bi evina azadiya kurd û Kurdistan bi  dengê zelale  bihevra  surudê Neteweyî EY REQIB  xwandin û şeva xwe bi dumahî anîn. 
 

B.Befrîn